Asiantaeth Safonau Bwyd Cymru

Mae ein cylch dylanwad yn ymwneud â'r broses 'o'r fferm i'r fforc' - hynny yw, o'r man lle caiff y bwyd ei dyfu neu ei weithgynhyrchu tan y bydd yn cyrraedd eich plât. Rydym yn eich rhoi chi, y defnyddiwr yng Nghymru, yn gyntaf.

Mae gan 40 aelod o staff Asiantaeth Safonau Bwyd Cymru ystod eang o arbenigedd proffesiynol ac ym maes polisi. Mae ein swyddfa wedi'i lleoli yng nghanol Caerdydd, ac o'r fan hon, rydym yn cyflawni amrywiaeth o swyddogaethau a oedd gynt yn ran o ddyletswyddau staff iechyd cyhoeddus ac amaethyddiaeth Cynulliad Cenedlaethol Cymru.

Ym 1999, cafodd pwerau dros ddiogelwch a safonau bwyd eu datganoli i Gynulliad Cenedlaethol Cymru. Mae'r Asiantaeth Safonau Bwyd yn atebol i'r Cynulliad Cenedlaethol a, thrwy'r Gweinidogion Iechyd, i'r Senedd. Mae'n fanteisiol gweithio yng nghyd-destun datganoli, am ei bod yn golygu y gallwn ystyried anghenion a materion sy'n ymwneud yn benodol â Chymru, tra'n parhau i sicrhau cysondeb ledled y DU yn y ffordd o fynd i'r afael â diogelwch bwyd, nad yw, wrth gwrs, yn cydnabod ffiniau gwleidyddol na daearyddol.

Bydd yr Asiantaeth yn diogelu buddiannau defnyddwyr o Gymru drwy ddilyn tri gwerth craidd. Bydd yn rhoi'r defnyddwyr yn gyntaf, bydd yn gweithredu'n agored ac yn hygyrch, a bydd yn llais annibynnol. Rydym yn gwneud ein gwaith mewn ffordd agored, ac mae'r penderfyniadau a wnawn yn agored ac yn dryloyw.

Ymhlith meysydd gwaith allweddol yr Asiantaeth yng Nghymru mae:

• Maeth - rhoi cyngor i'r cyhoedd, y Cynulliad Cenedlaethol ac eraill ar faeth a deiet, gan gydweithio â'r Cynulliad mewn meysydd o rannu cyfrifoldeb;
• Diogelu defnyddwyr - drwy orfodaeth a monitro effeithiol, gan gydweithio'n agos ag Awdurdodau Lleol Cymru;
• Lleihau salwch a gludir gan fwyd - gweithio â diwydiannau a gorfodwyr i leihau halogiad, a hyrwyddo ymwybyddiaeth y cyhoedd o ddulliau diogel o drin bwyd;
• Sicrhau diogelwch bwyd - er enghraifft, drwy gyfrannu at weithredoedd yn y DU i sicrhau nad yw cemegion yn peryglu diogelwch bwyd, a bod rheoliadau BSE wedi'u gorfodi'n llawn;
• Cefnogi dewis i ddefnyddwyr - drwy labelu cywir ac ystyrlon nad yw'n camarwain a thrwy sicrhau bod gwybodaeth am faterion yn ymwneud â diogelwch bwyd, canlyniadau arolygon a gweithgaredd gorfodi ar gael i'r cyhoedd.

Caiff ein gwaith ei oruchwylio gan Bwyllgor Cynghori'r Asiantaeth Safonau Bwyd. Sefydlwyd y Pwyllgor i roi cyngor a gwybodaeth i'r Asiantaeth yng Nghymru, a'r cadeirydd yw John Spence, sydd hefyd yn aelod Cymru o Fwrdd yr Asiantaeth Safonau Bwyd. Mae cyfarfodydd pwyllgor agored, a gynhelir bob hyn a hyn o fisoedd mewn lleoliadau ledled y wlad, yn enghraifft o ymrwymiad Asiantaeth Safonau Bwyd Cymru i dryloywder.